Donn Ancelo
Siccu, longu e 'llampanato u vecchiu, avrà avuto, pe' mia che era picciridda, che ne sacciu, ottocentotrentatrè anni, donn Ancelo era o spesere da zia Lina.
Era sempre vistuto di tutto puntu cu 'na giacchetta, nu gilè, na
camisa senza collo, e nu paio 'e carzuni, rigorosamente spaiati. 'n
testa u berrettu di un colore 'ndecifrabile, iddru su azava ca' mano
si raspava a testa e si lu ricollocava a so posto. Il tutto gli
conferiva l'aspetto distinto quasi di omo d'affari...como dicu...
affari culinari. A conferma di chisto aviva sempri sutta o brazzo 'na
borza da spisa, oggi si dirrebbe vintagge, enorme e scusuta, megghiu
di chidde "the brigge".
Era u specialista da fera e luna, canosciva bancarelle e banditori,
non si faciva fregare da nisciuno; u piso da roba u calcolava cull'occhi,
p'a frischizza du pisci o di mulinciani non s'avia a discutere cu
iddu, era tassativo: se diceva ca no era no; che pigghiassero e cose
bone pi iddu, chidde tinte e dassero a quaccun'autru.
Ogni matina veniva 'n casa da zia Lina a pigghiare l'ordinazioni pa'
iurnata: chidde tipiche erano:
> du chilate di pummaroro p'a sarsa,
> un munzeddu di muliciani chidde "sita" ca suno duci e non
necessitano tanto di salamoia, da fari fritti ca' non devono mai
mancare a tavola,
> i sarde po' iattu chiamato "Micio" di nome e cognome che non
contava molti trofei, infatti surici non ce n'era e nonostante
questa carenza di performance era trattato come un signore 'nglisi
(e sunno dui), ca non si putia disturbare se facia u riposino, non
si poteva allisciare pirchi' era un tipo nerbusu e allura, ma propiu
raramente cu me frate, facivamo finta che, combinazione, cà so cura
ne capitava per caso ne mani e allura a tiravamo, ma pocu pocu,
chianu chianu,
> a frutta frisca e abbondante non avia a esseri matura assa', ma
neppure virdi massenò faciva mali o addirittura acidità, e cussi'
ivano bene nell'ordine: du chili di persiche, du di susine ca' fanno
bene..., mi capite,...favoriscono in caso di pigrizia, du di sbegie,
du di piricocche e basta pi oggi,
> a verdura, ca' non aviva a mancare a sira cu formaggio e l'ova,
putiva essere tenerume di zucca, che era frisca e non faciva mali 'n
caso d'infiammazione di stomacu, massenò sanapune ca' a morte so'
veramente, 'n cuscienza, era ca' sosizza rustuta, oppure cocuzzedda
da fare a minestrina.
Donn Ancelo si pigghiava l'ordinazioni e partiva pa' spedizioni tisu
tisu e seriu seriu come fusse cosa di ranne responsabilità che solo
omini veri putivano portari a compimento.
Doppo un'orata si ricogghiva affranto di fatica e sudatizzo pi avire
fatto i scali caricatu, che erano sulu do' piani, ma di chiddi di
case vecchi do centro, ca ogni scalune era auto quanto almeno dò. Ma
era cuntentu, ci ridivano tutti i rughi da faccia.
Alluna a zia Lina ci faciva l'ispezione: i pummarori erano nu pocu
maccati, ma Donn Ancelo ci diceva ca s'erano strapazzati 'na borza,
"vossia u sape che mittendo 'na cosa supra l'autra po succediri". O
prezzo poi, pì me zia era sempre troppo auto e ogni iorno ripitiva a
stessa cantilena ca si faciva fregare supra ù pisu, ca a qualità non
era chidda giusta ecc. ecc. ma Donn Ancelo beatamente ogni volta
rispundiva: "Se non ci piace a vossia...nente ci fa, mu manciu iu!"
(cosa ca succidiva spessu).
Nu jorrno non vinni e manco chidd'autru e chiddu appresso, allura
capii: Donn Ancelo sinni vosse andare da vero gentlemenne inglisi
senza manco che nessuno l'avia licenziatu.